კანდიდატთა ნაკრებმა მონტენეგრო დაამარცხა

საქართველოს ნაკრების კანდიდატთა გუნდმა ჩინეთის საერთაშორისო ტურნირზე, „სოლიდარობის თასი“ გამარჯვებით დაიწყო. ალეკსანდრ ჯიკიჩის ასისტენტ მარკო ესპოზიტოსა და ნიკა ცინცაძის გაწვრთნილმა გუნდმა მონტენეგროს კანდიდატებით დაკომპლექტებულ ნაკრებთან 76:63 მოიგო.

თამაში შედარებით მძიმედ დავიწყეთ. მეტოქემ საწყის წუთებში საკმაოდ ბევრი სამქულიანი ჩააგდო და დაწინაურდა, მაგრამ საქართველოს ნაკრებმა პერიმეტრი მალევე გადაკეტა და ხისტი დაცვისა თუ სწრაფი შეტევების ხარჯზე თამაშში დაბრუნდა – პირველი მეოთხედი 25:25 დასრულდა.

გარდამტეხი მომენტი მეორე პერიოდი აღმოჩნდა, რომელიც ქართველი კალათბურთელების სრული დომინაციით წარიმართა. სწრაფი კონტრშეტევებითა და ზუსტი შორი სროლებით ჩვენმა გუნდმა ხელჩასაჭიდი უპირატესობა მოიპოვა, მეოთხედი 25:9 მოიგო და დიდ შესვენებაზე 16-ქულიანი ლიდერობით (50:34) გავიდა. მესამე პერიოდში მონტენეგრომ ერთადერთხელ მოახერხა ინტრიგის დაბრუნება, როცა ზედიზედ სამი ჩაგდებული სამქულიანით ჩამორჩენა რვა ქულამდე შეამცირა. ესპოზიტომ მოედანზე გამოცდილი მოთამაშეები დააბრუნა და თამაში ჩვეულ, საიმედო კალაპოტში ჩააყენა – მესამე მეოთხედი 62:52 დასრულდა, ხოლო საბოლოოდ საქართველოს ნაკრებმა 76:63 გაიმარჯვა.

სამწვრთნელო შტაბმა სათამაშო დრო თითქმის ყველა მოთამაშეზე თანაბრად გადაანაწილა. გუნდს 13 ქულითა და 9 მოხსნით ბექა ბექაურმა ულიდერა; 10-10 ქულა დააგროვეს ნიკოლოზ გაფრინდაშვილმა, ცოტნე ცარციძემ და რომან ჭინჭარაულმა (7 მოხსნა); 7-7 ქულა ჩააგდეს ლუკა ლიკლიკაძემ (5 პასი), ლევან გოგიჩაიშვილმა და ლუკა მაზიაშვილმა (7 მოხსნა, 6 პასი); გიორგი კობახიძემ 6 ქულა მიითვალა; ვილი ისიანმა – 3; გიორგი ოგბაიძემ – 2; გეგა წულაიამ – 1; ვახტანგ გაფრინდაშვილმა 5 მოხსნა მიითვალა.

შემდეგ მატჩს საქართველოს ნაკრები მასპინძელ ჩინეთთან 25 ივლისს გამართავს.