კოლოსალური შეთავაზება არაბეთიდან – ჟორჟის ახალი ვარიანტი

სატრანსფერო ფანჯრის მიწურულს გიორგი მიქაუტაძის გარშემო კვლავ გაუგებრობაა. თითქოს მოგვარებული ამბავი, რომ გიორგი ამ სეზონს ლიონში გაატარებდა, მოულოდნელად თავდაყირა დადგა, რადგან ფრანგულ კლუბს ფინანსური ვალდებულებების გამო შეიძლება მიქაუტაძის გაყიდვა მაინც მოუწიოს.

აქამდე გავრცელებული ცნობებით, მიქაუტაძის გადასაბირებლად ევროპული გუნდები აქტიურობდნენ – გაჟღერდა ვილიარეალის, ბრენტფორდისა და ბარნლის ვარიანტები.

იტალიელი ჟურნალისტი ნიკოლო სკირა კი სრულიად განსხვავებულ და მოულოდნელ ვარიანტზეც ალაპარაკდა საუდის არაბეთის სახით. როგორც ირკვევა, არაბული ნეომი ლიონს მიქაუტაძის სანაცვლოდ 40 მილიონ ევროს სთავაზობს, თავად ქართველ ფორვარდს კი ოთხწლიან მსუყე შეთავაზებას.

ჯერჯერობით, ამ საკითხზე ჟორჟის პოზიცია უცნობია. ბოლო ინფორმაციით, მიქაუტაძეს არათუ არაბეთში გადასვლა, არამედ მშობლიური გუნდის დატოვებაც არ სურს, შესაბამისად, შეგვიძლია ვივარაუდოთ, რომ ქართველ ფორვარდს კონტინენტური ევროპის დატოვების ინტერესი არ უნდა ჰქონდეს.