კორღალიძე: “გუნდი ძალას იპოვის, რომ ჩემპიონატში კარგად იასპარეზოს”

იბერია 1999 კონფერენს ლიგას მეორე საკვალიფიკაციო ეტაპზე დაემშვიდობა. მიუხედავად იმისა, რომ განმეორებითი შეხვედრა ესტონურ ლევადიასთან ფრედ – 2:2 დასრულდა, ორი მატჩის ჯამში ქართული გუნდი ტურნირს გამოეთიშა.

მატჩის დასრულების შემდეგ მთავარმა მწვრთნელმა, ლევან კორღალიძემ პრესკონფერენციაზე ჟურნალისტების კითხვებს უპასუხა და წარუმატებლობის მიზეზებზეც ისაუბრა:

“ამ წუთას, ემოციურად ძალიან რთულია ბევრი რამის თქმა. პირველი ტაიმიდანვე თვალში საცემი იყო, რომ საგოლე მომენტების გამოყენებას გვიჭირდა. ბევრი მიმართულებით გვაქვს სამუშაო.

ბოლო ეპიზოდზეც უნდა ვთქვა,.როცა ვრბანეცი მეკარესთან ერთი-ერთზე აღმოჩნდა და დარტყმა არ სცადა – ესეც პრობლემის ნაწილია, როცა ფეხბურთელი არასწორ გადაწყვეტილებას იღებს.

სამწუხაროდ, შედეგს ვეღარ შევცვლით. ახლა რთულია იმის თქმა, როგორ იმოქმედებს ეს მარცხი ჩემპიონატში ჩვენს გამოსვლაზე, თუმცა მჯერა, რომ ამ გუნდს ექნება შანსი, ძალები მოიკრიბოს და ეროვნულ ლიგაში ღირსეულად იასპარეზოს”.