რას ეუბნება პსჟ-ს პრეზიდენტი ლევან კობიაშვილს ხვიჩა კვარაცხელიაზე

საქართველოს ფეხბურთის ფედერაციის პრეზიდენტმა, ლევან კობიაშვილმა, Geo Team-თან მიცემულ ინტერვიუში ისაუბრა პსჟ-ს პრეზიდენტთან ბოლო პერიოდში გამართულ დიალოგზე, რომლის მთავარი თემა ხვიჩა კვარაცხელია გახლდათ.

კობიაშვილის თქმით, ფრანგული გრანდის ხელმძღვანელი კვარაცხელიას მიმართ განსაკუთრებულ დამოკიდებულებას არ მალავს და მუდმივად გამოხატავს აღფრთოვანებას მისი უნარებისა და ხასიათის გამო.

“ამ ადამიანთან არაერთხელ მქონია კომუნიკაცია და ყოველთვის იგრძნობა, რამდენად დიდ მნიშვნელობას ანიჭებს ხვიჩას. მისთვის კვარაცხელია არ არის უბრალოდ ფეხბურთელი. არ მალავს, რომ დიდი ხანია მისი გუნდში ხილვა სურდა და ახლა, როდესაც ეს სურვილი რეალობად იქცა, ამას ღიად გამოხატავს. მისგან ხშირად მესმის, რომ ხვიჩას გუნდის ნაწილად ყოფნა მისთვის ნამდვილად ბედნიერებაა”, – ამბობს კობიაშვილი.

მისივე თქმით, კვარაცხელიას მიმართ სიმპათია მხოლოდ მოედანზე ნაჩვენები თამაშით არ შემოიფარგლება. პსჟ-ს პრეზიდენტი განსაკუთრებით აფასებს მის პიროვნულ ღირებულებებსაც.

“ხვიჩას მხოლოდ ფეხბურთელი არ ეწოდება. ის ადამიანურადაც გამორჩეულია. ეს ფაქტი განსაკუთრებით შესამჩნევია უცხოელი გულშემატკივრებისა და კლუბის ხელმძღვანელობისგან”, – დასძინა კობიაშვილმა.