ლუკა ლოჩოშვილი ბუნდესლიგაში ითამაშებს

მიუხედავად იმისა, რომ ლუკა ლოჩოშვილის ნიურნბერგმა ბუნდესლიგაში გადასვლა ვერ მოახერხა, ჩვენებური მაინც გერმანიის მთავარ ლიგაში ითამაშებს. ლოჩოშვილი კარიერას კიოლნში გააგრძელებს.

ინფორმაცია თავად კლუბმა დაადასტურა, სადაც ლუკამ სამედიცინო შემოწმებაც გაიარა. მხარეებმა კონტრაქტი 2029 წლის ზაფხულამდე გააფორმეს, ხოლო ტრანსფერის ღირებულებამ ოთხი მილიონი ევრო შეადგინა.

კიოლნისთვის ქართველი ფეხბურთელი უცხო არ არის – იქ რევაზ და არჩილ არველაძეებს უთამაშიათ. „თხებმა“ გასულ სეზონში 32 ქულით მე-14 ადგილი დაიკავა.

ლოჩოშვილმა კი, ნიურნბერგის 33 მატჩში მიიღო მონაწილეობა და ხუთი გოლი გაიტანა, რაც მცველისთვის ძალიან მაგარი შედეგია.

ლუკა ლოჩოშვილი:

„როგორც ფეხბურთელს, ყოველთვის გინდა უმაღლეს დონეზე თამაში. სწორედ ამიტომ, კილნში გადასვლით ძალიან ბედნიერი ვარ. ხელმძღვანელობასთან მოლაპარაკებები ძალიან პოზიტიური იყო და ადვილად დამარწმუნეს. მოუთმენლად ველი თამაშს კლუბში, რომელსაც ასეთი მდიდარი ტრადიციები აქვს და ფანტასტიკური გულშემატკივრები ჰყავს“.

ლოჩოშვილმა კარიერა დინამო თბილისში დაიწყო, შემდეგ სლოვაკურ ჟილინასა და ავსტრიულ ვოლფსბერგერში ითამაშა, საიდანაც კრემონეზეში გადავიდა. იტალიაში მან ნახევარი სეზონი სალერნიტანას შემადგენლობაშიც გაატარა.

ლუკას საქართველოს ნაკრებში 32-ჯერ უთამაშია და ოთხი გოლიც შეაგდო.