“მან მითხრა, რომ თუ ჩემი ოცნებების ასრულება მინდოდა, სერიოზულად უნდა მოვქცეულიყავი” — უსმან დემბელე

ცოტა ხნის წინ, პარი სენ-ჟერმენის ფრანგმა ვარსკვლავმა უსმან დემბელემ გამოცემა FourFourTwo-ს ინტერვიუ მისცა, სადაც ბარსელონაში ლეო მესისთან გატარებულ პერიოდზე ისაუბრა.

ხვიჩა კვარაცხელიას თანაგუნდელი 2017 წელს,  148 მილიონი ევროს სანაცვლოდ, დორტმუნდის ბორუსიადან ბარსელონაში გადავიდა. მან კატალონიური გრანდის ყურადღება ბუნდესლიგაში ჩატარებული შესანიშნავი სეზონით მიიქცია. იმ პერიოდში, კლუბიდან ახლახანს წასული ნეიმარის შემცვლელად სწორედ დემბელე განიხილებოდა. ბარსელონამ შემტევის სანაცვლოდ 148 მილიონი ევრო გადაიხადა, რაც დღემდე ბუნდესლიგის რეკორდია. კამპ ნოუზე გადაბარგებულ დემბელეს კი გასახდელში ლეგენდარული ლიონელ მესი დახვდა.

“მესისთან პირველივე დღიდან ძალიან კარგი ურთიერთობა მქონდა. ის ისეთი ადამიანი იყო, ვინც ინსტინქტურად იცოდა, რა გინდოდა” — განაცხადა ფრანგმა ინტრევიუში. როგორც ირკვევა, მესი დემბელეს რჩევებსაც ხშირად აძლევდა. “მან მითხრა, რომ თუ ჩემი ოცნებების ასრულება მინდოდა, სერიოზულად უნდა მოვქცეულიყავი – ამის შემდეგ მოედანზე ვუყურებდი და მისგან ბევრს ვსწავლობდი.”

ორმა ფეხბურთელმა ბარსელონას მაისურით ოთხი სეზონის განმავლობაში ერთად  95 შეხვედრა ჩაატარა. 2021 წელს კი ოქროს ბურთის 8-გზის მფლობელს გუნდის დატოვება და პსჟ-ში გადასვლა მოუწია.

მიუხედავად ამ ყველაფრისა, ფრანგმა შემტევმა ბარსელონაში მასზე დამყარებული იმედები ვერ გაამართლა. ხშირმა ტრავმებმა და არასტაბილურმა პერფორმანსებმა მისი კატალონიური კარიერა გაანადგურეს.

ამჟამად კი დემბელე თავადაა ოქროს ბურთის მოგების ზღვარზე — პსჟ-სთან ერთად ჩატარებული ისტორიული სეზონის შემდეგ, სწორედ ფრანგს მოიაზრებენ ყველაზე პრესტიჟული ინდივიდუალური ჯილდოს მოპოვების მთავარ ფავორიტად. ასე რომ, შეიძლება ითქვას ლეო მესის რჩევებმა საბოლოოდ შედეგი მაინც გამოიღო.