დღეს, 20 ივლისს, დავით ყიფიანის სახელობის საქართველოს თასის 1/16 ფინალური ეტაპის ძირითადი ნაწილი დასრულდა და მერვედფინალში გასული გუნდების უმეტესობის ვინაობაც უკვე ცნობილია.
პირველი შეხვედრა ტყიბულში გაიმართა, სადაც ეროვნული ლიგა 2-ის წარმომადგენელმა მეშახტემ გაგრას უმასპინძლა. დრამატულ მატჩში იმერულმა კლუბმა დამატებით დროში 2:1 გაიმარჯვა. ანგარიში პირველ ტაიმში, დამატებულ წუთებზე ლევან ქურდაძემ გახსნა. გაგრამ ანგარიში გიორგი ხარებაშვილის გოლით 50-ე წუთზე გაათანაბრა. გადამწყვეტი გოლი კი დავით ნაჭყებიამ 118-ე წუთზე გაიტანა და მეშახტე მერვედფინალში გაიყვანა.
მეორე თამაში თბილისურ დერბის წარმოადგენდა, სადაც ლოკომოტივმა დინამო თბილისი 2 3:0 დაამარცხა. გოლები ლაშა კოხრეიძემ, ლაშა მენთეშაშვილმა და ლუკა მეტრეველმა გაიტანეს.
მესამე მატჩში, რომელიც თბილისში ილია კოკაიას სახელობის ბაზაზე გაიმართა, დინამო ბათუმმა მეოთხე ლიგის წარმომადგენელი გაგრა 2 5:0 დაამარცხა. ბათუმელთა მხრიდან გოლები ლუკა ქაფიანიძემ, ლუკა წულიკიძემ, დმიტრი მანდრიჩენკომ, ნიკა დუმბაძემ და უერდი მარამ გაიტანეს.
მეოთხე შეხვედრა დაძაბული და დრამატული გამოდგა — ფოთის კოლხეთმა სტუმრად გარეჯი პენალტების სერიაში დაამარცხა. ძირითადი დრო 1:1 დასრულდა, ხოლო 11-მეტრიანების სერიაში ფოთელებმა 4:2 იმარჯვეს და მომდევნო ეტაპზე გავიდნენ.
მეხუთე დაპირისპირებაში წყალტუბოს სამგურალმა მინიმალური ანგარიშით 1:0 სძლია გონიოს. ერთადერთი გოლის ავტორი მათე აბულაძე გახდა.
მორიგი 1/16 ფინალური შეხვედრა რუსთავსა და თელავს შორის შედგა, სადაც ქვემო ქართლელებმა 1:0 იმარჯვეს. გადამწყვეტი გოლი ჟან სოუზა დე ალმეიდას ანგარიშზეა.
დარჩენილი ორი მატჩი 21 და 22 ივლისს გაიმართება: ვიტ ჯორჯია შინ იბერია 2-ს დაუპირისპირდება, ხოლო თბილისი 2025 კი ბოლნისის სიონს უმასპინძლებს
შედეგად, მერვედფინალის წყვილები ამ დროისთვის ასე გამოიყურება:
ოდიში 1919 – სამტრედია
მეშახტე – მარტვილის მერანი
იბერია 1999 – ტორპედო ქუთაისი
შტურმი – ლოკომოტივი თბილისი
სპაერი – კოლხეთი 1913
სამგურალი – დილა გორი
დარჩენილი ორი მერვედფინალური წყვილი ხვალ და ზეგ გახდება ცნობილი, რის შემდეგაც სრული სურათი გაირკვევა.
