ნიკა ბურჯანაძის შეგირდებმა ევროპა მარცხით დაიწყეს

საქართველოს 16 წლამდე ნაკრები ერთადერთია ასაკობრივებში, რომელიც ევროპის ჩემპიონატის ფინალურ ეტაპზე ასპარეზობს. თუმცა, ნიკა ბურჯანაძის შეგირდებმა ტურნირი მარცხით დაიწყეს და ისრაელთან 75:97 წააგეს.

16 საუკეთესო გუნდი რუმინეთის ქალაქ ორადეაში შეიკრიბა, სადაც ჩვენი მიზანი A დივიზიონში ადგილს შეინარჩუნებაა.

პირველი პერიოდი მეტ-ნაკლებად თანაბარ ორთაბრძოლაში წარიმართა და საქართველოს ნაკრები რამდენჯერმე დაწინაურდა კიდეც, თუმცა 10 წუთის შემდეგ ისრაელმა ექვსქულიანი უპირატესობა მოიპოვა – 28:22; მეორე პერიოდში მეტოქემ მატჩზე კონტროლი დაამყარა. მათ ზუსტ შორ სროლებსა და სწრაფ გარღვევებს ჩვენი გუნდის შეცდომები დაემატა და ტაიმი ებრაელთა სხვაობით, 57:36 დასრულდა. მესამე მეოთხედში ისრაელმა სტაბილური თამაში გააგრძელა, უპირატესობა კიდევ ოთხი ქულით გაზარდა და შეხვედრის ბედი გადაწყვიტა.

საქართველოს ნაკრების შემადგენლობიდან შედეგიანობით გამორჩეული გახლდათ ცოტნე დგებუაძე, რომელმაც 27:35 წუთში 26 ქულა, 8 პასი და 4 მოხსნა დააგროვა და გუნდის საუკეთესო მოთამაშე გახდა; სხვა ქართველი კალათბურთელი 10-ქულიან ზღვარს ვერ ასცდა.

ტურნირი სპეციფიკური ფორმატით მიმდინარეობს და ჯგუფიდან ფლეი ოფში ყველა გუნდი გადის. თუმცა ჯგუფში მოგებებსა და დაკავებულ ადგილს უდიდესი მნიშვნელობა აქვს, რადგან მაღალი პოზიცია პლეი-ოფის პირველ რაუნდში შედარებით სუსტ მეტოქესთან შეხვედრის გარანტიას იძლევა.

საქართველოს ნაკრები მორიგ შეხვედრას 8 აგვისტოს, ესპანეთის ეროვნული გუნდის წინააღმდეგ გამართავს.