ონანა ეშმაკებს აღარ სჭირდებათ

მანჩესტერ იუნაიტედის სამომავლო გეგმებში ანდრე ონანას გუნდში ყოფნა აღარ შედის. წითელმა ეშმაკებმა კამერუნელი მეკარე 2023 წელს საკმაოდ ძვირად – 51 მილიონ ევროდ შეიძინეს და მასზე დიდ იმედებსაც ამყარებდნენ, მაგრამ ონანას მანჩესტერული კარიერა მთლად წარმატებული ვერ გამოდგა. კი, ის გუნდის ძირითადი კიპერი გახლდათ, მაგრამ მოლოდინი იმაზე მეტი იყო, ვიდრე ეს ონანამ აჩვენა. მოკლედ, მან გაცემული ავანსები ბოლომდე ვერ გაამართლა.

ჰოდა, მანჩესტერ იუნაიტედმაც 29 წლის მეკარე თურქეთში, კერძოდ კი ტრაპზონსპორში გაანათხოვრა. ონანა თურქულ კლუბში მიმდინარე სეზონის ბოლომდე დაჰყოფს, შემდეგ კი გამოჩნდება კვლავ ოლდ ტრაფორდს დაუბრუნდება, ტრაპზონში დარჩება თუ სადმე სხვაგან ამოჰყოფს თავს.

პრემიერლიგაში ანდრე ონანამ 72 მატჩში კარი მშრალად 18-ჯერ შეინახა, 2023-24 წლების სეზონში ასოციაციის თასი მოიგო, ხოლო წინა სეზონში ევროპა ლიგის თასის აღმართვასთანაც ახლოს იყო, მაგრამ ფინალში მანჩესტერი ტოტენჰემთან დამარცხდა.

ანდრე ონანას წითელ ეშმაკებთან კონტრაქტი 2030 წლამდე აკავშირებს.