“ლოს ბლანკოს” ახალი ცხრიანი ცნობილია

ცნობილია, თუ ვინ ჩაიბარებს კილიან მბაპეს 9-ნომრიან მაისურს მადრიდის რეალში. ხანგრძლივი პერიოდის შემდეგ პირველად, ლეგენდარული ცხრიანი ესპანელ ფეხბურთელს ერგება.

როგორც მოგეხსენებათ, ცოტა ხნის წინ კილიან მბაპემ საკუთარი 9-ნომრიანი მაისური დათმო და კლუბიდან ახლახანს წასული ლუკა მოდრიჩის ათიანი მოირგო. წესით, ლეგენდარული ნომრის მფლობელი ბრაზილიელი ენდრიკი უნდა ყოფილიყო, მაგრამ ტრავმებმა და არასახარბიელო პერფორმანსებმა თავდამსხმელი უკან დაწიეს და მის მადრიდულ კარიერასაც სერიოზული საფრთხე შეუქმნეს.

ენდრიკის ნაცვლად, 9-ნომრიანი მაისურით თამაშის პრივილეგია პირველ გუნდში ახლახან დაწინაურებულ გონსალო გარსიას ერგო. 21 წლის ესპანელის დებიუტი რეალის ძირითად შემადგენლობაში მსოფლიოს საკლუბო ჩემპიონატზე შედგა, სადაც მან სოლიდური თამაში აჩვენა.

მადრიდული კლუბის ეს გადაწყვეტილება ისტორიულია — გარსია ფერნანდო მორიენტესის შემდეგ რეალის პირველი ესპანელი ცხრიანი გახდება.

რაც შეეხება ენდრიკს — ტრავმის მოშუშების შემდეგ, ახალგაზრდა ბრაზილიელს შემტევ ხაზში ადგილის დასამკვიდრებლად სერიოზული კონკურენციის გაწევა მოუწევს.