16 წლამდე ნაკრები B დივიზიონში დაქვეითდა

საქართველოს 16 წლამდე კალათბურთელთა ნაკრები ერთადერთო იყო ასაკობრივ გუნდებში, რომელიც ევროპის ჩემპიონატზე თამაშობდა. თუმცა, ტურნირი მძიმე შედეგით დაასრულა – შვიდივე მატჩი წააგო და უძლიერესთა შორისი ადგილი დაკარგა.

ჯგუფურ ეტაპზე საქართველო ისრაელთან (75:97), ესპანეთთან (51:75) და საბერძნეთთან (63:86) დამარცხდა; მერვედფინალში საფრანგეთთან (64:89) წააგეს და ბრძოლა დარჩენისთვის გააგრძელეს; თურქეთთან (71:79) მარცხის შემდეგ, A დივიზიონში დასარჩენად ორივე მატჩის მოგება სჭირდებოდათ. თუმცა, ჯერ ისრაელთან (72:91) ამ ტურნირზე მეორედ წააგეს, შემდეგ კი, ტურნირზე უკვე უმოტივაციო, B დივიზიონში დაქვეითებული გუნდების ფორმალური შეხვედრაღა დარჩა სლოვენიასთან, სადაც ჩემპიონატის ბოლო, მე-15 და მე-16 ადგილები ნაწილდებოდა. საბოლოოდ, ჩვენები 66:67 დამარცხდნენ და ბოლო, მე-16 ადგილზე გავიდნენ.

საქართველოს 16 წლამდე ნაკრები სამი წლის მანძილზე ასპარეზობდა ევროპის A დივიზიონში, თუმცა წლეულს ელიტაში ადგილის შენარჩუნება, ვერ მოახერხა. მომავალ წელს ჩვენი გუნდი B დივიზიონში გადაინაცვლებს, საიდანაც კვლავ დაიწყებს ბრძოლას უძლიერესთა რიგებში დასაბრუნებლად.