ცნობილია – სად სურს კარიერის გაგრძელება მიქაუტაძეს

თავდაპირველი მითქმა-მოთქმის შემდეგ, თითქოს გადაწყვეტილი ამბავი იყო, რომ გიორგი მიქაუტაძე ახალ სეზონს ლიონში შეხვდებოდა, თუმცა, სატრანსფერო ფანჯრის მიწურულს შეიძლება სიტუაცია შეიცვალოს.

საქმე ისაა, რომ მიქაუტაძის გადაბირება ვილიარეალსა და ბრენტფორდს სურს, ხოლო ორივე მათგანი მზადაა ისეთი შეთავაზების გასაკეთებლად, რომელზეც უარის თქმა ლიონს ფინანსური პრობლემების გამო ძალიან გაუჭირდება.

ფრანგული მედია აქტიურად ალაპარაკდა, რომ მსუყე შეთავაზების სანაცვლოდ ლიონი მზადაა, თავისი გუნდის ერთ-ერთი ლიდერი დათმოს, მაგრამ აქ ჯერი მიქაუტაძეზეა, რომელსაც მშობლიურ კლუბში დარჩენა აქვს გადაწყვეტილი.

როგორც ირკვევა, მიქაუტაძეს ამ სეზონის გატარება ლიონში სურს და ეს გადაწყვეტილება მყარია. ალექსანდრ ლაკაზეტის წასვლის შემდეგ გიორგი ლიონის მთავარი ფორვარდი გახდა და სურს, რომ ეს სეზონი გუნდის ლიდერის როლში სწორედ ლიგა 1-ში გაატაროს.

სატრანსფერო ფანჯრის დასრულებამდე რამდენიმე დღეა დარჩენილი, მიქაუტაძის მიმართ ინტერესი კი მზარდია. ვნახოთ, რომელიმე მათგანი თუ შეძლებს ქართველის გადარწმუნებას.