გიგაურმა მსოფლიოს ზემოდან გადმოხედა

სასიხარულო ამბავი მოვიდა შორეული პერუდან, სადაც ძიუდოში ახალგაზრდებს შორის მსოფლიო ჩემპიონატი გაჩაღებულა.

პერუს დედაქალაქ ლიმაში გაშლილ ტატამზე 66 კილოგრამ წონით კატეგორიაში მოასპარეზე თორნიკე გიგაური კვარლცხბეკის უმაღლეს საფეხურზე ავიდა. ახალგაზრდა ქართველმა ძიუდოისტმა ფინალში ნეიტრალური სტატუსით მოჭიდავე რუსი აბდულახ პარჩიევი გააკრა ბეჭებზე. ქართველმა რუსს იპონით აჯობა.

თორნიკე გიგაურს ოქროს მედლის მოსაპოვებლად ხუთი ორთაბრძოლის მოგება დასჭირდა. განსაკუთრებით დაძაბული და თვალსასეირო კი ნახევარფინალური დაპირისპირება გამოდგა, სადაც ჩვენებური აზერბაიჯანელ მეტოქესთან თითქოს უიმედოდ  ვაზარისა და იუკოს ჩამორჩენით აგებდა, მაგრამ ბოლოს მაინც იპონით გამარჯვება იზეიმა.

პირველ საშეჯიბრო დღეს ტატამზე კიდევ ერთი ქართველი ძიუდოისტი გიორგი ჩანქსელიანი (66კგ) გავიდა, მაგრამ სამწუხაროდ ტურნირს მეორე წრეში გამოეთიშა.

შეგახსენებთ, ლიმაში საქართველოს ნაკრები მხოლოდ ვაჟთა გუნდით არის წარმოდგენილი.