ევროპულ სცენაზე მეორე კვარაცხელია გამოჩნდა

იტალიელთა ყურადღება ხვიჩა კვარაცხელიას შემდეგ უმცროსმა ძმამ, თორნიკე კვარაცხელიამაც მიიპყრო.

15 წლის თორნიკე საქართველოს 17 წლამდე ნაკრების ფეხბურთელია და ევროპის ჩემპიონატის საკვალიფიკაციო ეტაპის მატჩებიც ითამაშა. მართალია, ჩვენებმა ორივე თამაში წააგეს (ისლანდია 1:5; საბერძნეთი 1:2), მაგრამ უმცროსი კვარას თამაში, მიუხედავად იმისა, რომ ჯამში ერთი თამაში გამოუვიდა, შეუმჩნეველი მაინც არ დარჩენილა.

აი, რას წერს Sportitalia თორნიკე კვარაცხელიაზე:

„ფეხბურთი კვარაცხელიების ოჯახური ტრადიციაა. სანამ ნაპოლის ყოფილი ფეხბურთელი საფრანგეთში პსჟ-სთან ერთად ბრწყინავს, დააკვირდით მის უმცროს ძმას, რომელიც ახლა იწყებს საკუთარი ტალანტის წარმოჩენას. თორნიკე ჯერ მხოლოდ 15 წლისაა, მაგრამ მისი ტალანტის დასადასტურებლად, სოციალურ ქსელში ვირუსულად გავრცელებული ვიდეოც კი საკმარისია, სადაც საქართველოს 17 წლამდე ნაკრების ფორმა აცვია.

თორნიკე ხვიჩას უმცროსი ძმა არის და ახალგაზრდული ევროპული ფეხბურთის სცენის დაპყრობა დაიწყო. საქართველოს 17 წლამდე ნაკრებში მოძრაობები ნაპოლიში მოთამაშე ხვიჩას გაგახსენებთ.

2010 წლის 7 თებერვალს დაბადებული თორნიკე ძალიან იმედისმომცემი მარცხენა ვინგერია, რომელმაც საქართველოს ინტერის აკადემიაში დაიწყო განვითარება. უმცროს კვარას იმედი აქვს, რომ ძმის ნაკვალევს გაჰყვება“.

გეტყვით რომ, თორნიკე კვარაცხელია წლის დასაწყისში ინტერის აკადემიიდან დინამო თბილისს შეუერთდა.