ნანას ყაიმი, ლელას მარცხი

ბათუმში მიმდინარე მოჭადრაკე ქალთა მსოფლიო თასი გადამწყვეტ ფაზაში შედის. დღეს გაიმართა მერვედფინალური დაპირისპირებების პირველი პარტიები.

მეოთხედფინალში გასასვლელად ორი ქართველი ბრძვის, აქედან ერთის შანსი შედარებით ნაკლებია.

ლელა ჯავახიშვილი შავი ფიგურებით ჩინელ სონგ იუქსინს ეთამაშა და დამარცხდა. ჩვენებურმა რამდენიმე უმნიშვნელო შეცდომა დაუშვა, რამაც თავი ბოლოს ერთიანად იჩინა და 47-ე სვლაზე მეტოქეს დანებდა.

შავი ფიგურებით ითამაშა ნანა ძაგნიძემაც, რომლის მეტოქეც უკრაინელი მარია მუზიჩუკი იყო. მეტოქეები 54-ე სვლაზე ყაიმზე შეთანხმდნენ.

წყვილები ხვალ მეორე პარტიებს ითამაშებენ და თეთრებით უკვე ქართველი მოჭადრაკეები იქნებიან.

სხვა პარტიები ასე დასრულდა: ლი ტინჟიე-უმიდა ომონოვა 1:0; დივია დეშმუხი-ჟუ ჟინერი 1:0; თან ჟუნი-იულია ოსმაკი 1:0; ალექსანდრა კოსტენიუკი-კონერუ ჰამპი 0,5:0,5; კატერინა ლაჰნო-ჰარიკა დრონოვალი 0,5:0,5; ვაიშალ რამეშბაბუ-მერუერტ კამალიდენოვა 0,5:0,5.