რამაზ სვანაძე – მიხარია, რომ დიდი ანგარიშით გავიმარჯვეთ

ეროვნული გუნდისგან განსხვავებით, გაგვახარა ახალგაზრდულმა ნაკრებმა, რომელმაც ევროპის ჩემპიონატის შესარჩევი ეტაპის მესამე ტურში სტუმრად მალტა 5:0 გაანადგურა.

ცხადია, მატჩის შემდეგ კმაყოფილი იყო 21 წლამდე ნაკრების მთავარი მწვრთნელი რამაზ სვანაძე, რომელმაც მედიასთან შემდეგი კომენტარი გააკეთა.

„აუცილებელი და საჭირო 3 ქულა მოვიპოვეთ. მიხარია, რომ დიდი ანგარიშით გავიმარჯვეთ. გუნდი შეთამაშდა, სისტემურად იმოქმედა, მოედანზე ყველაფერი გააკონტროლა და შედეგიც მივიღეთ.

სამუშაო კიდევ ბევრი გვაქვს. ნოემბერში რთული შეხვედრები გველოდება და კარგად უნდა მოვემზადოთ. ნაკრების კანდიდატებმა თავიანთ კლუბებში თავი უნდა გამოიჩინონ. ახალი გუნდი ვართ და ლოგიკურია ის ადგილი, სადაც ვართ. მთავარია, რომ ბრძოლაში ვრჩებით. ნოემბრის სანაკრებო მატჩების შემდეგ, კი ბევრი რამ გამოჩნდება“ – თქვა რამაზ სვანაძემ.

სამი ტური შემდეგ სვანაძის შეგირდები  ხუთი ქულით მესამე ადგილზე არიან. მომდევნო ორ მატჩს საქართველოს ახალგაზრდული ნაკრები 14 ნოემბერს სტუმრად საბერძნეთთან, ხოლო 18 ნოემბერს შინ გერმანიასთან გამართავს.