უეფას პრეზიდენტმა ეტიკეტის წესები დაარღვია

ბოლოს იტალიურმა გუნდმა ჩემპიონთა ლიგა 15 წლის წინ მოიგო. ეს ინტერმა ჟოზე მოურინიოს მწვრთნელობის პერიოდში შეძლო.

მართალია, მილანური გრანდი იგივეს გაკეთებასთან ახლაც ახლოს იყო და ყველაზე პრესტიჟული ევროპული ტურნირის ფინალშიც გავიდა, მაგრამ იქ პსჟ-სთან რომ განადგურდა ფეხბურთის ქომაგთ კარგად მოეხსენებათ.

ინტერის დიდი ხნის წინანდელი ტრიუმფი იმად გავიხსენეთ, რომ უეფას პრეზიდენტმა ალექსანდრ ჩეფერინიმ მედიასთან ფრიად საინტერესო და ბევრისთვის შესაძლოა საკამათო კომენტარი გააკეთა. მართალია, საფეხბურთო თანამდებობის და მითუფრო ისეთი ორგანიზაციის ბოსებს როგორიც უეფაა საჯარო სიმპატიების გამოხატვა ეკრძალებათ, მაგრამ ჩეფერინიმ ეს არაფრად ჩააგდო და გააჟღერა თუ რომელი ჩემპიონატი მოსწონს ყველაზე მეტად.

„იტალიური ფეხბურთი ყოველთვის გამორჩეული იყო. არ დაგიმალავთ და ჩემი ფავორიტი ჩემპიონატიც სერია ა გახლავთ. ვფიქრობ, ეს იმის დამსახურებაა, რომ ფედერაციის პრეზიდენტად გაბრიელე გრავინი მოვიდა. მას შემდეგ იტალიურ ფეხბურთში ბევრი რამ სასიკეთოდ შეიცვალა. გუნდებიც პროგრესირებენ და იტალიის ჩემპიონატის ხარისხის მატებაც თვალსაჩინოა“ – აღნიშნავს უეფას თავკაცი.