არ იქნება წერილი? არ იქნება იანისიც

ითამაშებს თუ არა იანის ადეტოკუნბო ევრობასკეტზე? ცხადია, ყველაზე მეტად ამის შესახებ ბერძენი ქომაგები წუხან, თუმცა ეს ამბავი არანაკლებ აინტერესებს ქართველ გულშემატკივარსაც, რადგან ჯგუფურ ეტაპზე ჩვენი გუნდის ერთ-ერთი მეტოქე სწორედ ელადელები არიან.

ბერძენი ვარსკვლავი გაურკკვეველ სიტუაციაშია. საბერძნეთის ნაკრები მოსამზადებელ შეკრებას სალონიკში გადის, იქვეა იანისიც, თუმცა არა გუნდთან ერთად, არამედ ცალკე ინდივიდუალურად ვარჯიშობს. ამის მიზეზი კი მილუოკი ბაქსია, რომლის კალათბურთელიც ადეტოკუნბო გახლავთ.

საქმე იმაშია, რომ სანამ მილუოკ ბაქსისგან ოფიციალური თანხმობის წერილი არ იქნება, მანამდე ბერძენ კალათბურთელს გუნთად ყოფნის და ვარჯიშის უფლება არ აქვს. სწორედ ამის გამო გამოტოვა მან ამხანაგური მატჩებიც.

ეს ყველაფერი კი სადაზღვევო პოლიტიკის გამო ხდება. მართალია, მას საბერძნეთის კალათბურთის ფედერაცია ფარავს, მაგრამ იანისის კონტრაქტის სიდიდის გამო არასაკმარისად იცავს მილუოკის ინტერესებს თუ ის ტრავმას მიიღებს. სწორედ ამის გამო ვერ გადის ბერძენი კალათბურთელი პარკეტზე ბაქსის წერილობითი ნებართვის გარეშე.

იგივე პრობლემის წინაშე იდგნენ ლუკა დონჩიჩი და ნიკოლა იოკიჩი, თუმცა მათ თავიანთი კლუბებისგან წერილობითი დასტური უკვე მიიღეს და სლოვენიელი და სერბი ვარსკვლავებიც ევრობასკეტისთვის აქტიურად ემზადებიან.