ნაკრებში სკამზე, კლუბში ძირითადში

უეფას ჩემპიონთა ლიგის პარალელურად, იგივე ტურნირი რომ ახალგაზრულ გუნდებს შორისაც იმართება ფეხბურთის ქომაგთ არ ესწავლებათ. ჰოდა, ამ ეგიდით გამართულ დაპირისპირებაში ბელგიურმა უნიონ სან ჟილუაზმა ინტერს უმასპინძლა და 1:2 დამარცხდა.

ჩვენი ამ მატჩისადმი ინტერესი კი 18 წლის ქართველი მეკარის გიორგი ყავლაშვილის გამო იყო გამოწვეული. საქართველოს ახალგაზრდული ნაკრების კიპერმა გუნდი რამდენჯერმე გაშვებული გოლისგან კი გადაარჩინა, მაგრამ საბოლოო ჯამში მის კარის ბადეში მეტოქემ ბურთი ორჯერ მაინც გაახვია.

უეფას ახალგაზრდულ ჩემპიონთა ლიგაზე სან ჟილუაზს სამი ტურის შემდეგ ამდენივე ქულა აქვს, მომდევნო მატჩს კი ბელგიური კლუბი მადრიდში ატლეტიკოს წინააღმდეგ გამართავს.

შეგახსენებთ, გიორგი ყავლაშვილი ბელგიაშია დაბადებული და გაზრდილი, ხოლო მისი სიმაღლე თითქმის ორი მეტრია. ის რამაზ სვანაძემ ახალგაზრდულ ნაკრებში ოქტომბრის მატჩებისთვის კი გამოიძახა, მაგრამ ამ ეტაპზე ოდენ სათადარიგო მეკარის სტატუსით.