საქართველომ ოცეულის კარი შეაღო

ახალი არაფერია იმაში, რომ ევრობასკეტის დასრულების შემდეგ ფიბამ სანაკრებო რეიტინგი განაახლა. ცხადია, ჩვენთვის საინტერესო საქართველოს ნაკრების პოზიციაა და ამ მხრივ სასიხარულო ამბავი ნამდვილად გვაქვს.

ეჭვგარეშე იყო, რომ ევროპის ჩემპიონატზე ჩვენი გუნდის წარმატებული თამაში და ის ისტორიული შედეგი, რაც ალექსანდრ ჯიკიჩის გაწრთვნილებმა დადეს უკვალოდ არ ჩაივლიდა. საუკეთესო რვა გუნდში მოხვედრა პატარა საქმე ნამდვილად არ გახლავთ.

ჰოდა, საქართველოც ოთხი საფეხურით დაწინაურდა და ოცეულის კარიც შეაღო. საკალათბურთო ჯვაროსნები რეიტინგში ზუსტად მე-20 ადგილს იკავებენ.

გასაკვირი არ უნდა იყოს, რომ რეიტინგის სათავეშია ამერიკის ნაკრები, ევრობასკეტის ტრიუმფატორი გერმანია მეორე პოზიციაზეა, ხოლო მესამე ადგილზე სერბეთია.

ოცეული კი ასე გამოიყურება:

4. საფრანგეთი

5. კანადა

6. ავსტრალია

7. ესპანეთი

8. არგენტინა

9. ლიეტუვა

10. ბრაზილია

11. ლატვია

12. თურქეთი

13. საბერძნეთი

14. სლოვენია

15. იტალია

16. პუერტო რიკო

17. ფინეთი

18. მონტენეგრო

19. პოლონეთი

20. საქართველო